2Cor 11 | ASO | STEP | Gamazi ngomo mene lo-lengemeloni' nene negi monovolo' e'metelesuha lingine nemu' gosele' lengebelamivo ha gopo gililizahoo lo gele nouze. Lingine gopo a'mine gamazi'ne nene gililo.

2 Corinthians 11

Paulo' Aza Kolidi Aleve Soza Aposolo nGe'metikelizave Lo Engikisi Eikisi Do Milise' Ogo Ningo Eikumu' Nene nGivile' O Nouve Lo Monovolo Lo-ngimine' Gamazi

1 Gamazi ngomo mene lo-lengemeloni' nene negi monovolo' e'metelesuha lingine nemu' gosele' lengebelamivo ha gopo gililizahoo lo gele nouze. Lingine gopo a'mine gamazi'ne nene gililo. 2 Ido' negi monovolo' e'meteloni' nene O'moso'mo lengikumu' ei' inite'vevo' minilisave lo amuzo molo gele minaa' neine' ne'mino nazasi lengikumu' a'mine'mine ogo amuzo molo gele nouvonako nemu' nene a'mine negi monovolo' e'meto neni' monovo'nemu' do naba ogo lolosuve. Ido' lengikumu' amuzo molo gele nouve noluvoni' nene lingine gopo monovolo' monesa'mine' alu ne'mine mini a'mine ve hamotokovo' vi gi'mizilizave lo Kilisitoda izeni o-lengedekuvoni' nenako nemu' nene lengikumu' nazasi nene amuzo molo gele nouve. 3 Gosiheli'mo Eva'ni do neu' manau' ogo golo izine' ne'mino evene' malite gotine izi lutine gatine di gopo igi lutine Kilisito' ei' hamoto' milaa' naadoti' nene lengele'mize gopo ikelizave lo gopo ga'ne nogiluve. 4 Ido' gopo ga'ne nogiluvoni' nene evene' mali'mo lengita ogo Izesu'nimu' lo-lengemeline' nene laza ezemu' lo-lingimunidi'mine lamo ato' gamazi lo-lengemaa' neihe ido' O'moso'mi Sikalahu' lingine gomu' dani' ne'mi emeni dameni've nene atoli'mine neivosa a'mine ve'mo dalizave lo lo-lengemeline' sikalahuli'mi emeni dameni've nene atoli'mine minaa' neihe ido' O'moso'mi gamazi lamine' gomu' gili dani' ne'mine minamo atoli'mine gamazi O'moso'mi gamazi lamine' ve lo lo-lengemaa' neihe ne'mine oga' neine' nene lingine a'minemu' gosele' lengebelamivo gamazi lamine' ve li gilingili igi gilaa' naani' nenako nemu' nene naza gopo ga'ne nogiluve. 5 Ne'mine ogo naza giluvoni' nene a'mine aposolo atoli'mine igi dizisa nizave lave engitoti' nene naza ngomo ne'minesi nene ma lemeti' ogo nouve lo gelamuve. 6 Lamine' naza nene gamazi do lisihe' ogo laakumu' nene sukulu ma lamuvoni' nenako ne'mo engi' nene gamazi laato' nivile' i nilisaha mono' monovo gelaa' nene gele nge lo gele nouve. Naza ne'mino nouvoni' nene laza ne'mine mana'mine gono nodunidoti' nene soto' gehepeve do soto' ogo lengelebizekune.

7 Naza nene lengi' do'mo dize-lengedelesa na'nise oko'ne do'mo lemo O'moso'mi gamazi lamine' lo-lingimuvoni' nene inele ogo haza gidini lo-lingimuvoni' neve nene goloso nite' dokuhe. 8 Ee, lengita neve gono dalongumu' nene noso' nite'ne nevo'mine nene lengitati' ma damo asi engita gono damo mino Izesu' evenele mulise atotati' nene gumine gidini dokuve. 9 Ne'mine noluvoni' nene naza linginesi minuvoni' gameneu' inite' ma vise' uvoni' inite' nene leze zuho Makedonia misubouti' ave nete nene mudise hizi ele' i-nidikevosa naza nene inite' vise' uvoni' ne'mi geni've nene lengita ve hamokisi ma gehe-damuvoni' nenako nemu' nene noluve. Ee, naza lengita evene' hamokisi ne'mine mana'mine geni nene gehe-lengedalove lo gizebo lekeseve ogo minuvoni' ve. Ne'mine ogo minuvoni' nenako mo ne'minevo' o do vo minelesuve. 10 Naza Kilisito' gamazi gihile nenita neive loloni' nene lingine gosoho' laane li ataize lamilisave. A'mine gamazi nene mo lamineto' nenako lingine mo gili nizave. Ido' a'mine'mine ogo gamazi mene ma loloni' nene mo lamineto' lolosuve. Ado' naza lengi' Akaia misubou' mono' gono daa' nouvoni' nene meni've nomine' haza gidini daa' nouvongumu' nolize izo do naba ogo laa' nouvoni' aka'ne nene evene' hamolitesi mo keke' hizi tili-nidamilisave. A'mida gono daa' nouvodo' meni've nene inite' hamokisi mo keke' lengitati' ma damolosuve. 11 Ido' lengitati' inite' ma damolosuve noluvoni' nene naza lu'ne lengi' lengemamosa noluhe. O'ove. Neni' lu'ne lengeme nouvoni' nene O'moso'mo ningo gele neive.

12 A'mine ve lelito' lisihe' o none li oko'ine di dizi laa' naavete laa' naani' gamazi nene gamazi gihile gelalive lo a'mine aka hize tile-ngedelongumu' nene naza idise do nouvoni' monovo'ne mene ha o'mo voovo' mino meni ne'mino inite' mo keke' ma damolosuve. 13 Nene noluvoni' nene nanitekumu' ve. A'mine ne'mine ve nene soza aposolo mini mono' gono daa' naani' nene evene' go'ine izisa di mini oko'ine losuvoloti' nene Kilisito' aposolo ne'mine lili' igi minaa' nave. 14 Ne'mine iga' naangumu' nene upuho' olonido' nomive. Nanitekumu' ve. Gamene ma asi've Satani ne'mosi nene do atoli'mine ogo angelo' lamine' labanalasi minine' ne'mine nene lolo' oga' neinako 15 nemu' nene eze gonolo' ve netesi nene di ato' igi monovo lisiheli'mi gonolo' ve ne'mine lili' ilizani' nene inite' naba nomine' nenako ha lili' ilisave. A'mine ve nene ingine gono dani' votigilelo' nene gamene nabalo' lihime dalisave.

Paulo' Aza Ei' Monovomu' Imine' Molo Lo-ngemosa Mulumo Geni Gehe'mo Vo Gono Daa' Ingumu' Nene Lo-ngimine' Gamazi

16 Naza gomu' lokuvoni' ma nene gohi ti' lo nolo-lingimuve: Evene' hamolitesi nenikumu' nene negi ve li gilamilo. Ne'mine li gilamilizado' o neine'za lingine negi ve li gilili ma negi ningi mati ngimika' naani' ne'mine igi neni' nene ningi mati nimikavo nazasi nene monovo'nemu' ngomo ma do naba ogo lolove. 17 Ido' ne'mine gamazi loloni' nene Guvelesi ve'mi monovolo' e'metelovoba asi neni' monovo'nemu' gele ele'vole' ogo do naba ogo loloni' nene mo negi sunolo' e'metelesuha 18 evene' muki' oko'ine losuvoli'mi initekumu' nene di naba igi laa' naanako nazasi nene a'mine'mine ogo do naba ogo lolosuve. 19 Ee, lingine gamazi gele nge laa' nounive none li gilii negi aleve nene ha longolize izi ningi mati ngimika' naani' nenako naza nene a'mine negi sunolo' e'meto ha do naba ogo lolosuve. 20 Ee, evene' malite di gelekele' gehepeve i-lingidaa' nahe ido' lengi' initetine nene bili gizaa' naahe ido' lingimimise' igi gotine izaa' naahe ido' ingine evene' naba lili' igi di gize'ninguko i-lingidaa' naahe ido' a'ine gavoso gotine vetingu' lingibilahe ne'mine mana'mine ani' nene lingine ha ningi mati ngimika' naave. 21 Ingine ne'mine inite' i-lingidaa' naani' ne'mino laza a'mine ne'mine inite' o-lengedelonido' nene amuzoteu' lisihe' amive. Ido' ne'mine o-lengedelonido' nene amuzo molamune' nenako ne'mo nene lovozo helelonido' o neihe. O'ove. Ne'mine olonido' nomive lo noluve. Ne neiha evene' malite ngehelele izamivo engi' monovo'inemu' di naba igi lilizani' nene nani monovo'inemu' lilizahe nazasi a'mine'mine ogo nehelele izamivo neni' monovo'nemukisi do naba ogo lolosuve. Mene noluvoni' nene negi sunolo' e'metosa noluve. 22 Ingine Zuda ve leli' gulivete setohamo diti' igi Hebilaio' aleve none ido' Isilaele' aleve none ido' Abalahamu' a'vopilemo' zuhouti' nene none li laa' naha nazasi nene a'mine'mine ogo Hebilaio' ve ido' Isilaele' ve ido' Abalahamu' a'vopilemo' zuhouti' ve nene nouve. 23 Ido' ingine engikumu' nene Kilisito' gonolo' ve none laa' nahe. Mene loloni' nene godo'ningu' gamazi nomiveti sunolo' e'meto ti' lo noluve: Neni' nene engi' ngivile' ogosa Kilisito' gonolo' ve gehepeve ne nouve lo noluve. Gono neve nene engi' ngivile' ogo amuzo goloso molosa duve. Ido' monokumu' ve lo nala' numungu' nene gamene vai' goloso engi' ngivile' ogosa vo mineka' mineka' uvoni' ve. Ido' monokumu' ve li nibilani' nene engi' ngivile' ivosa gamene vai' goloso nibilani' ve. Ido' gamene muki' nene helaa' akalo' vaa' uvoni' ve. 24 Gamene faef nene Zuda vete nala' gavosotunu' sogo' saga' izi nibilani' nene gamene teoti naeni (39) ne'mine nene nibilani' ve. 25 Ido' gamene setohamo nene Loma vete lobuno gavosodunu' nibilani' ve. Ido' gamene sitohamo ne'mine nene sipiu' nomonuvo sipi izo itine' ve. Ne'mine ogo guvo nosolo' nene ha nouvo holuka' hamokisi holise' hamokisi ogo vine' ve. 26 Ido' gamene muki' goloso nene aka hota hota vai' monuve. Ne'mino monuvongu' nene noso'mo nibiline' hakaa' neive. Ido' lasikolite nibilani' hakaa' neive. Ido' neni' zuho Zuda ve nete nibilani' hakaa' neive. Ido' heta ato' ve netesi nene nibilani' hakaa' neive. Ido' numuno ebe' nabau' nesi nene ganala votene' oga' nouve. Ido' ebe' hadivela nesi ido' guvo nosolo' sipiu' monuvongu' nesi nene ganala votene' oga' nouve. Ido' Kilisito' evenele leze zuho none li soza laa' ave nete nene ganala di-nidilisa iga' naave. 27 Ido' naza nene nabuso'ne goloso ilivosa ato ato' gono muki' nene ele'vole' ogo duvoni' ve. Ne'mine ogo minuvongu' nene okise'nesi nene do guno ongosa'mo ido' noso' nitekumukisi nosomukisi nene ga'na helaa' ogo mino noso' nitekisi namo gamene vai' nene haza monaa' uvoni' ve. Ido' hepeku' nene oko'nelo' inite' nene hepeku' izo monaato' vo damivo hepe' novozo no'mo monaa' uvoni' ve. 28 Ido' neevo' nomive. Inite' gohi masi masi neine' lamuvoni' nesi ido' naza mono' mulise muki' gizebo o-ngedaa' geni nesi nene gamene gamene gehaa' nouve. 29 Ve mali'mo monoku' gilizevo ine' nene nenikisi a'mine'mi geni've nene gehesa'muvoba makato' gehe-lengedaa' nouvoni' ma neive. Ido' ve ma monokuti' limi ingani' nene naza engikumu' oko'ne hulosa'muvoba mo hulaa' nouvoni' ma neive.

30 Naza nenikumu' nene do naba ogo lolosa gelamuvoni'za nenikumu' do naba ogo lamo mineloni' aka nene ma nominako naza nene O'mosolo' lehete amo minelodo' nouvoba asi gilizevo o nouvoni' monovo'ne nemukovo' nene do naba ogo lolosuve. 31 Guvetesi ve Izesu' Kilisito' O'moso'vesi melehosi minive ado' opo'ni lo'mo vo nonivo osu' lamilive ne'mo me ve nene soza nomine' nemu' nene mo gele neive. 32 Damasiko numuno ebeku' nouvo a'mine misubo nabau' guvelesi ve naba Aleta' a'mine numuno ebeto' gizebo hulo-dive kiape' ne'mo nene pilisive ngimiselavo ingine neni' dalisa a'mine numuno ebeli'mi gatedo' nene gizebo igi nizavo 33 Izesu' evenelelite numuno ebeli'mi gesi ha'nau' viniduva' ma miningu' nene gosuvaha' goku' luhize nouvo nalato' nene huli heta i-nidikevo a'mine kiape' ne'mi anauti' nene golise vuvoni' ve.